aa chaa.Ndanii bhii merii tarah jaag rahii hai
palako.n pe sitaaro.n ko liye raat kha.Dii hai
ye baat ki suurat ke bhale dil ke bure ho.n
allaah kare jhuuTh ho bahuto.n se suunii hai
vo maathe kaa matalaa ho ki ho.nTho.n ke do misare
bachapan kii Gazal hii merii mahabuub rahii hai
Gazalo.n ne vahii.n zulfo.n ke phailaa diye saaye
jin raaho.n pe dekhaa hai bahut dhuup ka.Dii hai
ham dillii bhii ho aaye hai.n laahaur bhii ghume
ai yaar magar terii galii terii galii hai
[laahaur =Lahore]
aa.Nsuuo.n kii jahaa.N paayamaalii rahii
aisii bastii charaaGo.n se Khaalii rahii
dushmano.n kii tarah us se la.Date rahe
apanii chaahat bhii kitanii niraalii rahii
jab kabhii bhii tumhaaraa Khayaal aa gayaa
phir ka_ii roz tak beKhayaalii rahii
lab tarasate rahe ik ha.Nsii ke liye
merii kashtii musaafir se Khaalii rahii
chaa.Nd taare saabhii ham-safar the magar
zindagii raat thii raat kaalii rahii
mere siine pe Khushbuu ne sar rakh diyaa
merii baa.Nho.n me.n puulo.n kii Daalii rahii
abhii is taraf na nigaah kar mai.n Gazal ke palke.n sa.Nvaar luu.N
meraa lafz lafz ho aa_iinaa tujhe aa_iine me.n utaar luu.N
mai.n tamaam din kaa thakaa huaa tuu tamaam shab kaa jagaa huaa
zaraa Thahar jaa isii mo.D par tere saath shaam guzaar luu.N
agar aasamaa.N kii numaa_isho.n me.n mujhe bhii izn-e-qayaam ho
to mai.n motiyo.n kii dukaan se terii baaliyaa.N tere haar luu.N
[izn-e-qaayam=command to stop]
ka_ii ajanabii terii raah ke mere paas se yuu.N guzar gaye
ji.nhe.N dekh kar ye ta.Dap hu_ii teraa naam leke pukaar luu.N
ai husn-e-be-paravaah tujhe shabnam kahuu.N sholaa kahuu.N
phuulo.n me.n bhii shoKhii to hai kisako magar tujh saa kahuu.N
gesuu u.De mahakii fizaa jaduu kare.n aa.Nkhe terii
soyaa huaa ma.nzar kahuu.N yaa.N jaagataa sapanaa kahuu.N
cha.ndaa kii tuu hai chaa.Ndanii laharo.n kii tuu hai raaginii
jaan-e-tamannaa mai.n tujhe kyaa kyaa kahuu.N kyaa na kahuu.N
aisaa lagataa hai zindagii tum ho
ajanabii jaise ajanabii tum ho
ab ko_ii aarazuu nahii.n baakii
justajuu merii aaKhirii tum ho
mai.n zamii.n par ghanaa a.Ndheraa huu.N
aasamaano.n kii chaa.Ndanii tum ho
dosto.n se vafaa kii ummiide.n
kis zamaane ke aadamii tum ho
ek cheharaa saath saath rahaa jo milaa nahii.n
kisako talaash karate rahe kuchh pataa nahii.n
shiddat kii dhuup tez havaao.n ke baavajuud
mai.n shaaKh se giraa huu.N nazar se giraa nahii.n
aaKhir Gazal kaa taajamahal bhii hai makabaraa
ham zindagii the hamako kisii ne jiyaa nahii.n
jisakii mukhaalafat hu_ii mashahuur ho gayaa
in pattharo.n se ko_ii pari.ndaa giraa nahii.n
taariikiyo.n me.n aur chamakatii hai dil kii dhuup
suuraj tamaam raat yahaa.n Duubataa nahii.n
kisane jalaa_ii bastiyaa.N baazaar kyo.n luTe
mai.n cha.Nd par gayaa thaa mujhe kuchh pataa nahii.n
Gam chhupaate rahe muskuraate rahe
mahafilo.n mahafilo.n gun_gunaate rahe
aa.Nsuo.n se likhii dil kii tahariir ko
phuul kii pattiyo.n se sajaate rahe
Gazale.n kumhalaa ga_ii.n nazme.n murjhaa ga_ii.n
giit sa.Nvalaa gaye saaz chup ho gaye
phir bhii ahal-e-chaman kitane Khush_zauq the
naGmaa-e-fasl-e-gul gun_gunaate rahe
terii saa.Nso.n kii Khushbuu labo.n kii mahak
jaane kaise havaaye.n u.Daa laa_ii.n thii
vaqt kaa har qadam bhii bahakataa rahaa
zaqt le paa.Nv bhii Dag_magaate rahe
kabhii yuu.N bhii aa merii aa.Nkh me.n ke merii nazar ko Khabar na ho
mujhe ek raat navaaz de magar uske baad sahar na ho
[navaaz - to grant]
vo ba.Daa rahiim-o-kariim hai mujhe ye sifat bhii ataa kare
tujhe bhuulane kii duaa karuu.N to duaa me.n merii asar na ho
[rahiim-o-kariim - kind & generous; sifat - talent]
mere baazuo.n me.n thakii thakii , abhii mahav-e-Khvaab hai chaa.Ndanii
na uThe sitaaro.n kii paalakii, abhii aahaTo.n kaa guzar na ho
ye Gazal ki jaise hiran kii aa.Nkho.n me.n pichhalii raat kii chaa.Ndanii
na bujhe Kharaabe kii roshanii, kabhii becharaaG ye ghar na ho
vo firaaq ho yaa visaal ho, terii yaad mahakegii ek din
vo gulaab ban ke khilegaa kyaa, jo chiraaG ban ke jalaa na ho
kabhii dhuup de, kabhii badaliyaa.N, dil-o-jaa.N se dono.n qubuul hai.n
magar us nagar me.n na qaid kar jahaa.N zindagii kii havaa na ho
kabhii din kii dhuup me.n jhuum ke kabhii shab ke phuul ko chuum ke
yuu.N hii saath saath chale.n sadaa kabhii Khatm apanaa safar na ho
[shab - night]
mere paas mere habiib aa zaraa aur dil ke qariib aa
tujhe dha.Dakano.n me.n basaa luu.N mai.n ke bichha.Dane kaa kabhii Dar na ho
[habiib - beloved]
Khudaa ham ko aisii Khudaa_ii na de
ki apane sivaa kuchh dikhaa_ii na de
Khataavaar samajhegii duniyaa tujhe
ab itanii bhii zyaadaa safaa_ii na de
[Khataavaar=guilty]
ha.Nso aaj itanaa ki is shor me.n
sadaa sisakiyo.n kii sunaa_ii na de
abhii to badan me.n lahuu hai bahut
kalam chiin le raushanaa_ii na de
mujhe apanii chaadar se yuu.N Dhaa.Np lo
zamii.n aasamaa.N kuchh dikhaa_ii na de
Gulaamii ko barakat samajhane lage.n
asiiro.n ko aisii rihaa_ii na de
[barakat=blessing; asiiro.n=prisoners; rihaa_ii=freedom]
mujhe aisii jannat nahii.n chaahe
jahaan se madiinaa dikhaa_ii na de
mai.n ashko.n se naam-e-muhammad likhuu.N
qalam chhiin le raushanii na de
abhii to badan me.n lahuu hai bahut
qalam chhiin le roshanaa_ii na de
Khudaa aise irfaan kaa naam hai
rahe saamane aur dikhaa_ii na de
kuchh to mai.n bhii bahut dil kaa kamazor huu.N
kuchh muhabbat bhii hai fitaratan badagumaa.N
tazakaraa ko_ii ho zikr teraa rahaa
avval-e-aaKhirash daramiyaa.N daramiyaa.N
jaane kis desh se dil me.n aa jaate hai.n
chaa.Ndanii raat me.n dard ke kaaravaa.N
mil bhii jaate hai.n to kataraa ke nikal jaate hai.n
haaye mausam kii tarah dost badal jaate hai.n
ham abhii tak hai.n giraftaar-e-muhabbat yaaro
Thokare.n khaa ke sunaa thaa ki sambhal jaate hai.n
ye kabhii apanii jafaa par na huaa sharmindaa
ham samajhate rahe patthar bhii pighal jaate hai.n
umr bhar jin kii vafaao.n pe bharosaa kiije
vaqt pa.Dane pe vahii log badal jaate hai.n
mujhase bichha.D ke Khush rahate ho
merii tarah tum bhii jhuuThe ho
ik Tahanii par chaa.Nd Tikaa thaa
mai.n ye samajhaa tum baiThe ho
[Tahanii=branch]
ujale ujale phuul khile the
bilkul jaise tum ha.Nste ho
mujh ko shaam bataa detii hai
tum kaise kapa.De pahane ho
tum tanahaa duniyaa se la.Doge
bachcho.n sii baate.n karate ho
sar jhukaaoge to patthar devataa ho jaayegaa
itanaa mat chaaho use wo be-wafaa ho jaayegaa
ham bhii dariyaa hai.n hame.n apanaa hunar maaluum hai
jis taraf bhii chal pa.De.nge raastaa ho jaayegaa
kitanii sachchaa_ii se mujhase zindagii ne kah diyaa
tuu nahii.n meraa to ko_ii duusaraa ho jaayegaa
main Khudaa kaa naam le kar pii rahaa huu.N dosto.n
zahar bhii is me agar hogaa davaa ho jaayegaa
ruuTh jaanaa to mohabbat kii alaamat hai magar
kyaa Khabar thii mujh se wo itanaa Khafaa ho jaayegaa
sun lii jo Khudaa ne vo duaa tum to nahii.n ho
daravaaze pe dastak kii sadaa tum to nahii.n ho
simaTii hu_ii sharmaa_ii hu_ii raat kii raanii
so_ii hu_ii kaliyo.n kii hayaa tum to nahii.n ho
mahasuus kiyaa tum ko to giilii hu_ii palke.n
bhiige huye mausam kii adaa tum to nahii.n ho
in ajanabii raaho.n me.n nahii.n ko_ii bhii meraa
kis ne mujhe yuu.N apanaa kahaa tum to nahii.n ho
vo thakaa huaa merii baaho.n me.n zaraa so gayaa thaa to kyaa huaa
abhii mai.n ne dekhaa hai chaa.Nd bhii kisii shaaKh-e-gul pe jhukaa huaa
jise le ga_ii hai abhii havaa vo varaq thaa dil kii kitaab kaa
kahii.n aa.Nsuo.n se miTaa huaa kahii.n aa.Nsuo.n se likhaa huaa
[varaq = page]
ka_ii miil ret ko kaaT kar ko_ii mauj phuul khilaa ga_ii
ko_ii pe.D pyaas se mar rahaa hai nadii ke paas kha.Daa huaa
[mauj = wave]
mujhe haadaso.n se sajaa sajaa ke bahut hasiin banaa diyaa
meraa dil bhii jaise dulhan kaa haath ho mehandiyo.n se rachaa huaa
vahii Khat ke jis pe jagah jagah do mahakate ho.nTho.n ke chaa.Nd the
kisii bhuule-bisare se taaq par tah-e-gard hogaa dabaa huaa
[taaq = shelf; tah-e-gard = under the dust]
vahiii shahar hai vahii raaste vahii ghar hai aur vahii laan bhii
magar us dariiche se puuchhanaa vo daraKht anaar kaa kyaa huaa
[dariichaa = window; daraKht = tree]
mere saath juganuu hai ham_safar magar is sharar kii bisaat kyaa
ye charaaG ko_ii charaaG hai na jalaa huaa na bujhaa huaa
[sharar = spark/ember; bisaat = capacity/worthiness]
ye chaa.Ndanii bhii jin ko chhuute hue Daratii hai
duniyaa u.nhii.n phuulo.n kopairo.n se masalatii hai
shoharat kii bula.ndii bhii pal bhar kaa tamashaa hai
jis Daal pe baiThe ho vo TuuT bhii sakatii hai
lobaan me.n chi.ngaarii jaise koii rakh de
yuu.N yaad terii shab bhar siine me.n sulagatii hai
aa jaataa hai Khud khe.Nch kar dil siine se paTarii par
jab raat kii sarahad se ik rel guzaratii hai
aa.Nsuu kabhii palako.n par taa der nahii.n rukate
u.D jaate hai.n ue pa.nchhii jab shaaKh lachakatii hai
Khush rang pari.ndo.n ke lauT aane ke din aaye
bichha.De hue milate hai.n jab barf pighalatii hai
yuu.N hii besabab na phiraa karo, ko_ii shaam ghar bhii rahaa karo
vo Gazal kii sachchii kitaab hai, use chupake chupake pa.Daa karo
ko_ii haath bhii na milaayegaa, jo gale miloge tapaak se
ye naye mizaaj kaa shahar hai, zaraa faasale se milaa karo
abhii raah me.n ka_ii mo.D hai.n, ko_ii aayegaa ko_ii jaayegaa
tumhe.n jisane dil se bhulaa diyaa use bhuulane kii duaa karo
mujhe ishtahaar sii lagatii hai.n, ye mohabbato.n kii kahaaniyaa.N
jo kahaa nahii.n vo sunaa karo, jo sunaa nahii.n vo kahaa karo
kabhii husn-e-pardaanashii.n bhii ho zaraa aashiqaanaa libaas me.n
jo mai.n ban-sa.Nvar ke kahii.n chaluu.N, mere saath tum bhii chalaa karo
ye Khizaa kii zard-sii shaam me.n, jo udaas pe.D ke paas hai
ye tumhaare ghar kii bahaar hai, ise aa.nsuo.n se haraa karo
nahii.n behijaab vo chaa.Nd saa ki nazar kaa ko_ii asar nahii.n
use tanii garmi-e-shauq se ba.Dii der tak na takaa karo